Mi ricordo, da ragazzino, il falò che si accendeva all’angolo della Villa Comunale e la via per Latiano, nel giorno di San Giuseppe.
Lu fanòi
Circulandu ‘ntra tutti li pinzieri,
mi lu rricordu, mancu ci fo’ ieri,
lu fanòi, all’incròciu ti li strati,
cu ramàgghia e cu sàrcini ‘ggiustati.
La genti, tiempu prima, priparava
quantu pi’ divuziòni si brusciava.
Si spittava cu cala la sirata,
cu la folla turnu-turnu sistimata,
e ci lu jentu po’ li ‘nfumicava
allu mantàgnu nci si rriparàva.
La fiamma lenta-lenta s’inn’azàva
strati e parìti tuttu ‘lluminava,
e mentri l’aria già si sta’ scarfava
ogni piccinnu fermu no’ si stava.
Li fracìddi c’a tiempu scattrisciàunu
li canti ti carosi ‘ccumpagnàunu.
Lu rusariu ‘na divòta po’ ‘ntrunàva
e la litanìa toppu si cantava,
lu previti cu stola e acquasanta
biniticìa la croscia ch’era tanta.
Po’ cu lu sicchiu o ‘ntra la frascera
si pigghiàva lu fuecu binitèttu,
c’a casa si purtava quedda sera,
pi’ divuzioni e pi’ scarfà lu liettu.
di Emanuele Castrignanò
